Eduardo De Filippo (1900 - 31/10/1984)

Penziere mieje...

Penziere mieje, levàteve sti panne,

stracciàtev' 'a cammisa, e ascite annuro.

Si nun tenite n'abito sicuro,

tanta vestite che n'avit' 'a fa?

Menàteve spugliate mmiez' 'a via,

e si facite folla, cammenate.

Si sentite strillà, nun ve fermate:

nu penziero spugliato 'a folla fa.

Currite ncopp' 'a cimma 'e na muntagna,

e quanno 'e piede se sò cunzumate:

un'ànema e curaggio, e ve menate...

nzerrano ll'uocchie, primm' 'e ve menà!

Ca ve trovano annuro? Nun fa niente.

Ce sta sempe nu tizio canusciuto,

ca nun 'o ddice... ca rimmane muto...

e ca ve veste, primm' 'e v'atterrà.

'O pparlà nfaccia

Io chesto tengo:

tengo 'o pparlà nfaccia.

Pure si m'aggia fà nemico ' Ddio

e me trovo cu "isso"

faccia a ffaccia,

nfaccia lle dico chello c'aggia dì.

Se scummoglia 'o fenucchio?

E se scummoglia!

Ccà, pè tenè cupierte st'altarine,

se sò mbrugliate 'e llengue

e nun se sàpe

chi te fa bene

e chi

male te fa.

Si nun se mett' 'o dito ncopp' 'a piaga

e se pulezza scafutann' 'a rinto

fino a che scorre 'o sango

russo e vivo

cumm' a chello 'e Giesù

nostro Signore

'a piaga puzza!

E siente nu fetore

ca t'abbelena ll'aria

'a terra

'o mare.

E nuie vulimmo ll'aria fresca e pura

celeste e mbarzamata

e chillu viento

ca vulanno

e passànno

a rras' 'e mare

se piglia 'addore

e 'a mena int' 'e balcune

pè dint' 'e stanze

e arriva ncopp' 'e lloggie

d' 'e case noste.